President Thuchah  A hmasa berin tho leh Lal Isua hmingin kohhran member zawng zawngte chibai ṭha ber ka buk a che u.

Chhandamna Kohhran chuan Pathian hruainain kum 8 kan lo pumhlum ve ta reng mai! Lalpa chu fakin awm rawh se!

Kan hriat ṭheuh angin kan duh vang leh kan tum reng vang ni hauh loin Lalpan kan awmna tur kohhran min lo siamsak reng mai a lo ni a, he kohhran hi Chanchin Ṭha puangdarh tur te, mi dangte ṭanpui  tur te, Kristian mahni a ding thei (ringtu puitling) ni tur leh mi dangte kaihruai turin a member-te hi min ko a. Chu hna thawk thei tur chuan a member turte pawh harsatna te, thinlung natna te, endawngna leh hnawlna te min lo kaltlang tir hmasa a lo ni. Chu tuarna ruam aṭang chuan a member-te pawh inhmangaih tawn a, in dawm tawn a, belh tur dik Lal Isua a laia daha vuan tlat thei turin min lo duang a, Hmangaihna in a phuarkhawm, a laia Isua dinna kohhran ni turin.

Kum 8 lai Lalpan min hruai hnu hian kohhrante in en let ila tuna kan dinhmunah hian kan lungawi em? Lalpa min hruai thlen tumna kawngah hian kan la rap dik zelin kan hria em le? Keimahni ṭheuh i in en let ang u. Kan vela kohhran lo awm tawh leh changtlung zawkte tihdan entawn tur ringawtin Lalpan min ko chhuak lo a, chuvangin mi dangte tihdan entawn mai loin Lalpa min duh dan en chungin kohhranten ke i pen zel ang u.

Pathianin ram thara rawngbawl turin min ko a ni tih kan hria a, kalna lam tur pawh kan hriat loh laiin Odisha hmunah Lalpan min hruai lut a, tunah chuan ring thar mi 190 lai  kan lo nei ta, thawktu missionary  3-in an enkawl mek a, chutiang bawkin  Andra Pradesh-ah bul min ṭansak lehin tunah hian ring thar mi 51  leh thawktu 1 kan nei a, 2-ah tih pun tum mek a ni. Assam lamah hian Pro Pastor hoin thawktu 1 kan nei a, member 45 an awm mek a, Tripura-ah hian missionary pakhat neiin member 78 an awm mek a ni.

Mizoram chhung home mission hnuaiah Zawlpui leh Damdiai kohhrante an awm mek a, thawktu pakhat ve ve an awm bawk a ni. Kan mission field-a member-te leh thawktute tan hian kohhrante bang loin i ṭawngṭai ṭhin ang u. Heng mission field lama kan hmasawnnaah hian kan lawm rualin,  hetah hian lungawi mai thei kan la  ni lo a,  Lalpan a hmangaih mi maktaduai tam tak Chanchin Ṭha la hre lo India ram chhungah pawh  an la awm a, anni hnena Chanchin Ṭha hril tur hian Lalpan min ko a ni tih i hre reng bawk ang u.

Tun dinhmunah Mizoram chhungah kohhran member kan la ṭhahnem tawk lo a, Lalpa puihna nen lo chuan heng hna hautak tak mai thawk chhunzawm zel tur hian kan chakna hian kan tlin lo a ni tih hriain, kan Pathian hi kohhranten bang loin i au zel ila, keimahni pawh nasa zawka thawk thei turin i ṭang sauh sauh ang u.

Kohhranin hmachhawp hrang hrang a neihte zingah National Headquarters hmun hi kan la neih loh avangin tunah hian kan hotu mi ṭhahnemngaiten an zawng reng a, chutiang bawkin Aizawl khawpui chhungah Biak in hmun mamawhna a nasa hle a, hmun ṭha tak kan neih theih nan kohhranten Pathian hnenah bang loin i dil bawk ang u. Tunah hian Kohhran panga, Thingdawl kohhran, Vengthar kohhran, Mamit Bazar veng kohhran, Sawleng kohhran leh Zobawk kohhranten Biak in an sa mek bawk a ni.

A tawp berah chuan min ko chhuaktu Lalpa hian min koh chhante tihlawhtling tura ke kan pen  phawt chuan min pui tur hian eng lai pawhin a awm a ni tih hria ang u.

 Hei leh chen hi Lalpan min pui a ni, 1 Samuela 7:12

Lalpan malsawm che u rawh se.

 

(UPA LALTLANTHANGA)

President

Salvation Church of India